Chronic odisha
ମାଲକାନଗିରି, ନିରଞ୍ଜନ ମଲ୍ଲ(କ୍ରୋନିକ ଓଡ଼ିଶା)ମଙ୍ଗଳବାର ଦିନ ବିକ୍ରମ ଦେବ ବିଶ୍ଵବିଦ୍ୟାଳୟରୁ ତିନି ଜଣିଆ ଆଞ୍ଚଳିକ ପର୍ଯ୍ୟବେକ୍ଷକ ଦଳ ମାଲକାନଗିରି ଜିଲ୍ଲା ଚିତ୍ରକୋଣ୍ଡା ସ୍ଥିତ ସରକାରୀ ସ୍ନାତକ ମହାବିଦ୍ୟାଳୟ ପରିଭ୍ରମଣରେ ଆସିଥିଲେ। ବିଶ୍ଵବିଦ୍ୟାଳୟର ସମନ୍ଵୟ ଅଧିକାରୀ ଶ୍ରୀଯୁକ୍ତ ମହେଶ୍ଵର ଦୁରିଆଙ୍କ ନେତୃତ୍ୱରେ ଆସିଷ୍ଟାଣ୍ଟ ପ୍ରଫେସର କମଳ ଲୋଚନ ମଲ୍ଲିକ ଓ ଜ୍ଞାନ ରଞ୍ଜନ ମହାନ୍ତି ଏହି ପରିଭ୍ରମଣରେ ଆସି ମହାବିଦ୍ୟାଳୟର ବିଭିନ୍ନ ପ୍ରସଙ୍ଗରେ ତଦାରଖ କରି ଅଧ୍ୟକ୍ଷ ଡକ୍ଟର ଚିନ୍ମୟ କୁମାର ବେହେରାଙ୍କ ଠାରୁ ଅନେକ ଗୁରୁତ୍ଵପୂର୍ଣ୍ଣ ତଥ୍ୟ ସମୀକ୍ଷା କରିଥିଲେ। ମହାବିଦ୍ୟାଳୟର ଅନ୍ୟ ଅଧ୍ୟାପକ ଅଧ୍ୟାପିକା ଏବଂ ଛାତ୍ରଛାତ୍ରୀ ମାନଙ୍କ ସହ ମଧ୍ୟ ବିବିଧ ଆଲୋଚନା କରିଥିଲେ। ପରିଶେଷରେ ଛାତ୍ରଛାତ୍ରୀ ମାନଙ୍କୁ ସମ୍ବୋଧିତ କରି ଉତ୍ତମ ଉପଦେଶ ଦେବା ସହ ପରୀକ୍ଷା ପରିଚାଳନା ଏବଂ ମହାବିଦ୍ୟାଳୟର ଆଗାମୀ ଭବିଷ୍ୟ ସମ୍ପର୍କରେ ସୂଚିତ କରିଥିଲେ। ଚିତ୍ରକୋଣ୍ଡା ପରି ଅଣଅଗ୍ରସର ଅଞ୍ଚଳରେ ଏହି ଡିଗ୍ରୀ କଲେଜର ସୁପରିଚାଳନାର ଦିଗଦର୍ଶନ ଦେବା ସହ କଲେଜର ପ୍ରତ୍ୟେକ ସଦସ୍ୟ ମାନଙ୍କୁ ଭୂରି ଭୂରି ପ୍ରଶଂସା କରିଥିଲେ।
