Chronic odisha
ମାଲକାନଗିରି(କ୍ରୋନିକ ଓଡ଼ିଶା)ମାଲକାନଗିରି ଜିଲ୍ଲା ବାଲିମେଳା ଏନଏସିରେ ଆଜି ଦୁଃଖଦ ଘଟଣା ଘଟିଥିବା ଦେଖିବାକୁ ମିଳିଛି। ବାଲିମେଳା ସହର ୯ ନଂ ୱାର୍ଡ ରାଣୀ ସାହିର ବିଶ୍ୱନାଥ ମହାନ୍ତିଙ୍କ ପୁଅ ଲିପୁନ ମହାନ୍ତି(୭)ଙ୍କର ଆଜି ଭୋର ୩ ଟା ସମୟରେ ସାପ କାମୁଡ଼ାରେ ମୃତ୍ୟ ହୋଇଛି। ମିଳିଥିବା ସୂଚନାନୁଯାୟୀ ଲିପୁନ ନିଜ ବାପା ମାଆଙ୍କ ସହ ଶୋଇଥିବା ସମୟରେ ଆଜି ଭୋର ସମୟରେ ଏକ ଚିଟି ସାପ ଲିପୁନର ଜ୍ୟାକେଟ ଭିତରେ ପଶି ଯାଇ କାମୁଡି ଦେଇଥିଲା।ଏହା ପରେ ପୁଅ ଲିପୁନ ଚିତ୍କାର କରିବାରୁ ବାପା ମାଆ ସାପଟିକୁ କାଢି ବାହାରେ ଫିଙ୍ଗି ଦେଇଥିଲେ। ତେବେ କିଛି ସମୟ ପରେ ପୁଅ ଲିପୁନର ସ୍ୱାସ୍ଥ୍ୟବସ୍ଥା ବିଗିଡିବାରୁ ତାକୁ ବାଲିମେଳା ଆଞ୍ଚଳିକ ସ୍ୱାସ୍ଥ୍ୟକେନ୍ଦ୍ରକୁ ବାପା ମାଆ ନେଇଥିଲେ। ସେଠାରେ ଶିଶୁଟିର ସ୍ବାସ୍ଥ୍ୟ ଅବସ୍ଥା ଅଧିକ ଗୁରୁତର ହେବା ଦେଖି ଡାକ୍ତର ଶିଶୁଟିକୁ ମାଲକାନଗିରି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ। ତେବେ ମାଲକାନଗିରି ମୁଖ୍ୟ ଚିକିତ୍ସାଳୟରେ ଚିକିତ୍ସାଧିନ ଅବସ୍ଥାରେ ଶିଶୁଟିର ମୃତ୍ୟ ହୋଇଥିବା ଜଣାପଡିଛି। ଖବର ପାଇ ଓର୍କେଲ ପୋଲିସ ଘଟଣା ସ୍ଥଳରେ ପହଞ୍ଚି ଏକ ଅପମୃତ୍ୟ ମାମଲା ରୁଜୁ କରିବା ସହ ଶବ ବ୍ୟବଚ୍ଛେଦ ପରେ ପରିବାର ବର୍ଗକୁ ହସ୍ତାନ୍ତର କରିଛି। ଶିଶୁ ପୁତ୍ରର ମୃତ୍ୟରେ ପରିବାର ତଥା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
