ମାଲକାନଗିରି,୦୨/୦୩(କ୍ରୋନିକ ଓଡ଼ିଶା)ମାଲକାନଗିରି ଜିଲ୍ଲା କୋରୁକୋଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବ୍ଲକ ସ୍ତରୀୟ ଏଚପିଭି ଟୀକାକରଣର ଆଜି ଶୁଭାରମ୍ଭ ହୋଇଯାଇଛି।କୋରୁକୋଣ୍ଡା ଗୋଷ୍ଠୀ ଉନ୍ନୟନ ଅଧିକାରୀ ଅମୁଲ୍ୟ କୁମାର ସାହୁ ଏହି ଉଦଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ଟୀକାକରଣର ଶୁଭାରମ୍ଭ କରିଥିଲେ। ଅନ୍ୟ ଅତିଥି ମାନଙ୍କ ମଧ୍ୟରେ ଚିତ୍ରକୋଣ୍ଡା ବିଧାୟକ ପ୍ରତିନିଧି ବିନାୟକ ପାତ୍ର, ମାଲକାନଗିରି ବିଧାୟକ ପ୍ରତିନିଧି ମୁଁୟା ମାଡକାମୀ, ଡାକ୍ତର ପ୍ରୀତମ କୁମାର ସାହୁ, ଡାକ୍ତର ଅନିମେଶ କର, ବିପିଏମ କେ ମଣ୍ଟୁଙ୍କ ସମେତ ସ୍ବାସ୍ଥ୍ୟ ବିଭାଗର ଅନ୍ୟ କର୍ମଚାରୀମାନେ ମଧ୍ୟ ଉପସ୍ଥିତ ଥିଲେ। ଜରାୟୁ ଗ୍ରୀବା କର୍କଟର ପ୍ରତିରୋଧ ନିମନ୍ତେ ଏହି ଟୀକା ୧୪ ରୁ ୧୫ ବର୍ଷ ବୟସ ମଧ୍ୟରେ ରହିଥିବା ସମସ୍ତ ବାଳିକାଙ୍କୁ ମାଗଣାରେ ଦିଆଯିବ। ପ୍ରଥମ ଦିନରେ ଆଜି ୧୩ ଜଣ ବାଳିକାଙ୍କୁ ଏହି ଟୀକା ଦିଆ ଯାଇଛି। ଟୀକା ଦେବା ପରେ ସମସ୍ତ ବାଳିକାଙ୍କୁ ୩୦ ମିନିଟ ଡାକ୍ତରଙ୍କ ନିରୀକ୍ଷଣରେ ରଖାଯାଇଥିଲା। ଟୀକା ନେବା ପରେ କୌଣସି ବାଳିକାଙ୍କ ମଧ୍ୟରେ କୌଣସି ପାର୍ଶ୍ୱ ପ୍ରତିକ୍ରିୟା ଦେଖା ଯାଇନଥିବା ଜଣାପଡ଼ିଛି। ଆଜିର ଏହି ଟୀକାକରଣ ଉଦଘାଟନୀ ସମାରୋହରେ କୋରୁକୋଣ୍ଡା ସ୍ବାସ୍ଥ୍ୟ କେନ୍ଦ୍ରର ସମସ୍ତ ସହ କର୍ମଚାରୀ ମାନେ ସହଯୋଗ କରି କାର୍ଯ୍ୟକ୍ରମକୁ ସଫଳ କରିଥିଲେ।