Chronic odisha
ମାଲକାନଗିରି(କ୍ରୋନିକ ଓଡ଼ିଶା)ମାଲକାନଗିରି ଜିଲ୍ଲା କୋରୁକୋଣ୍ଡା ଥାନା ସଦର ଠାରେ ଥିବା ସରକାରୀ ସୁଲଭ ଦୋକାନ ବାହାରେ ଜଣେ ମହିଳାଙ୍କ ମୃତଦେହ ପଡିଥିବା ଆଜି ସକାଳେ କିଛି ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଏ ନେଇ ଅଞ୍ଚଳବାସୀଙ୍କ ତରଫରୁ ଘଟଣା ସମ୍ପର୍କରେ ତୁରନ୍ତ କୋରୁକୋଣ୍ଡା ଥାନା ଅଧିକାରୀଙ୍କୁ ସୂଚନା ଦେଇଥିଲେ । ସୂଚନା ପାଇବା କ୍ଷଣି ଥାନା ଅଧିକାରୀ ହିମାଂଶୁ ଶେଖର ବାରିକଙ୍କ ନେତୃତ୍ୱରେ ପୋଲିସର ଏକ ସ୍ୱତନ୍ତ୍ର ଟିମ ଘଟଣା ସ୍ଥଳରେ ପହଞ୍ଚି ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଥିଲେ । ମୃତ ମହିଳାଙ୍କ ନାମ ଗୁରୁବାରି ଦାସା ବୋଲି ଜଣା ପଡିଛି। ତେବେ କେଉଁ କାରଣରୁ ମହିଳାଙ୍କ ମୃତ୍ୟୁ ହୋଇଛି ତାହା ସ୍ପଷ୍ଟ ହୋଇପାରିନାହିଁ।ସ୍ଥାନୀୟ ଅଞ୍ଚଳରୁ ମିଳିଥିବା ସୂଚନା ମୁତାବକ ମୃତ ମହିଳାଙ୍କ ଘର କୁଡୁମୁଳୁଗୁମ୍ମା ଅଞ୍ଚଳରେ ହୋଇଥିବା ବେଳେ ସେ ଦୀର୍ଘ ବର୍ଷ ହେବ କୋରୁକୋଣ୍ଡା ଅଞ୍ଚଳରେ ରହି ବିଭିନ୍ନ ସ୍ଥାନରେ କୁଲି କାମ କରି ଚଳୁଥଲା । ହେଲେ ଆଜି ସକାଳେ ତାଙ୍କର ମୃତ ଦେହ ପଡିଥିବାର ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଏନେଇ ପୋଲିସ ତରଫରୁ ଏକ ଅପମୃତ୍ୟୁ ମାମଲା କେସ ନମ୍ବର ୧୮/୨୦୨୪ ରୁଜୁ କରିବା ସହିତ ମାଲକାନଗିରି ଏସଡ଼ିଓ ସଚିନ ପଟେଲଙ୍କ ଉପସ୍ଥିତିରେ କୋରାପୁଟରୁ ଆସିଥିବା ସାଇଣ୍ଟିଫିକ ଟିମର ଅଧିକାରୀ ମାନେ ସେଠାରେ ପହଁଞ୍ଚି ଘଟଣାର ତଦନ୍ତ କରିଥିଲେ।ଏହା ପରେ ପୋଲିସ ମୃତ ମହିଳାଙ୍କ ଶବକୁ ବ୍ୟବଛେଦ ନିମନ୍ତେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ଶବ ବ୍ୟବଛେଦ ସରିବା ପରେ ତାଙ୍କ ମୃତ ଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯିବ। ଶବ ବ୍ୟବଛେଦ ରିପୋଟ ହସ୍ତଗତ ପରେ ଓ ପୋଲିସ ପକ୍ଷରୁ ଚାଲିଥିବା ତଦନ୍ତ ସରିବା ପରେ ମୃତ୍ୟୁର କାରଣ ସ୍ପଷ୍ଟ ହେବ। ଏହାପରେ ପୋଲିସ ପକ୍ଷରୁ ଆଗାମୀ ପଦକ୍ଷେପ ଗ୍ରହଣ କରାଯିବ ବୋଲି କୋରୁକୋଣ୍ଡା ଥାନା ଅଧିକାରୀ ଶ୍ରୀ ବାରିକ ସୂଚନା ଦେଇଛନ୍ତି ।
